Пратеничката група на ВМРО-ДПМНЕ и коалицијата „Обнова за Македонија“, денеска, ја поднесoa Интерпелацијата за работата на претседателот на Собранието, Талат Џафери.
– Оваа интерпелација е резултат на хаосот кој што се случува во Собранието, а е под директива на Џафери и како резултат на се почестото кршење на Деловникот, како и самоволието кое што го спроведува во законодавниот дом, со што сериозно го загрозува угледот на оваа институција, изјави Никола Мицевски, координатор на Пратеничката група на ВМРО-ДПМНЕ и Коалицијата „Обнова за Македонија“.
Тој му порача на Талат Џафери да ја стави оваа интерпелација на пленарна седница, а не како предходната да ја крие во фиока и „ако смета дека работи одговорно да даде аргументи пред целата јавност, а доколку повторно избега и не ја стави на седница ќе даде до знаење нема ни грам одговорност кон функцијата што ја извршува“.
– Во досегашната работа, односно неработа на Талат Џафери, како претседател на Собранието, како никогаш досега не се случувале скандали и понижувања на пратениците само заради тоа што очигледно Џафери дефинитивно не сака или не знае капацитетно да води една демократска институција, рече координаторот на ВМРО-ДПМНЕ.
Тој ги повика сите пратеници од овој парламентарен состав да се приклучат кон интерпелацијата.
– Апелираме до пратениците од СДСМ и мнозинството дека сега е моментот, кога треба да се стават настрана партиските договори и да застанат во одбрана на човековите права, а потоа и во одбрана на Собранието на Република Македонија. Во спротивно, доколку не ја поддржат оваа интерпелација, ќе покажат дека, не само што го оправдуваат ваквото однесување на Џафери, туку и дека се дел од него, порача Мицевски.