Мицкоски да ја прифати, новогодишно, подадената рака на Филипче!

Новиот лидер на СДСМ, хирургот Венко Филипче, ја заинтригира јавноста со вчерашниот настап, нудејќи предлози и иницијативи, кои најавуваат новини во делувањето на опозициската партија, нокаутирана на последните избори.

Ако ја оставиме настрана, чисто партиската потреба, за ново позиционирање и факторизирање, предлозите на Филипче, сепак, заслужваат внимание, така што, лидерот на владеачката ВМРО ДПМНЕ, барањата на опозицијата за некаква лидерска средба, треба да ги прими поблагонаклоно, особено што и претседателката, професор д-р Гордана Сиљаноска – Давкова, инаку, негов избор, ги пофали ставовите и погледите на Филиче од нивната “конструктивна средба” во претседателскиот кабинет.

ВМРО ДПМНЕ, истовремено, треба да го потсмири во настапите пратеникот – портпарол Петрушевски, со неговите потценувачки изјави кон опозицијата и неизговарањето на М (Македонија) во името, на СДСМ.

Не е време за таква исклучивост!

Ако СДСМ, навистина, се охрабрил да се огради од соработката со ДУИ, да ги стави на испит заканите на интегративците за дестабилизација на земјата, со самото тоа, партијата најавува сојузништво со ВМРО ДПМНЕ и коалицијата, пред се, во парламентот.

-Партијата е подготвена за натпартиска соработка која ќе го стави интересот на граѓаните и државата пред политичките манипулации и поделби, ветува опозицискиот лидер.

Ако, новата национална платформа за национално и надпартиско обединување е “дел од новата платформа на партијата”(СДСМ), тогаш власта треба да му верува, дека, понудата до ВМРО-ДПМНЕ за “заедничка натпартиска државна стратегија која ќе го гарантира долгорочниот развој на државата”, е искрена и добронамерна.

Секако, новата партиска платформа на СДСМ трерба да подразбира и расчистување со криминалот и носителите на девијантните однесувања, од времето кога беа власт, со именување и јавно оградување од нив, макар биле и во пратеничките редови, колку тоа и да кошта.

СДСМ треба да знае дека јавното мајтапење со министрите кои, крадејќи од устите на гладниот народ, купуваа интимна облека за себе и XXL љубените, ќе биде со подолг рок на траење и дека срамот не се пере така лесно!

Опозицискиот лидер нуди натпартиска, наднационална и надетничка платформа, која ќе го стави интересот на граѓаните и државата пред политичките манипулации и поделби.

Тоа може да биде и тест за ВМРО ДПМНЕ, во однос на коалицирањето со ВЛЕН, особено околу поставената црвена линија од страна на Мицкоски за уставни измени со одложено дејство, општо прифатлив став мегу Македонците, нешто, кое вчера го бетонираше и претседателката Сиљаноска во новогодишното обраќање пред пратениците.

Политичките првенци од ВЛЕН, ќе мораат да заземат поцврст став, без лавирање, ако навистина сакаат да им помогнат на Македонците да останат Македонци во сопствената држава. Тие ја немаат слободата на интегративците, кај кои, се топи емпатичноста кон Македонците и нивните чувства и стравиувања, па “куд пукло – пукло!”.

Ако треба и на нови избори.

-Морам да кажам, дека прашањето „Дали ќе го смените Уставот“, ме навредува и како професорка и како претседателка, беше децидна вчера, Сиљаноска – Давкова.

Таа повика на “обединување во однос на евроинтеграциите и на консензус меѓу власта и опозициата околу заедничките државни интереси”, што, кај Филипче, беше дефинирано како “реален патриотизам“, како што вели, “со нови луѓе и нови политики, каде граѓаните ќе бидат на прво место“.