Работни групи на СДСМ и на ВМРО ДПМНЕ ќе го усогласуваат новиот Закон за јавно обвинителство, договориле на лидерската средба Заев и Мицкоски. Опозицијата бара Катица Јанева и нејзиниот тим да не се дел од СЈО.
„Новиот Закон за Јавното обвинителство го добивме во четвртокот и немавме многу време да се посветиме на супстанцата на Законот, но за ВМРО ДПМНЕ овој специјален обвинител го изгуби својот професионален кредибилитет за да ја добие нашата поддршка, вклучително и нејзиниот тим. Инаку принципиелно интегрирањето на СЈО во Јавното обвинителство може да го отвориме како тема, затоа што е дел од реформските закони, но правата и обврските на новото СЈО треба да бидат предмет на преговори“, рече Христијан Мицкоски претседател на ВМРО ДПМНЕ по средбата со Заев.
За разлика од Мицкоски, Заев кажа дека за „Владата е прифатливо СЈО да се вгради во Јавното обвинителство на чело со Катица Јанева и со целиот тим кои создадоа едно крајно добро“. Тој очекува да се постигне консензус за Законот со кој се гарантира иднината на СЈО.
На прашање дали Заев е подготвен да прифати Јанева и нејзниот тим да не бидат дел од Законот, тој кажа дека на Јанева мандатот и истекува на 15 септември, но „никому не можете да му ограничите правото повторно да се кандидира“.
„Давам целосна поддршка на Јанева и нејзиниот тим кои беа искрата за правда во оваа држава . Може и мене некој не ми се допаѓа, но институциите мора да се почитуваат“ кажа Заев.
Во Законот се лимитира користењето на прислушуваните разговори и тоа и дава право на опозицијата да го земе ова како алатка и да ги видиме како СЈО ќе се однесува и кон владечката гарнитура, додаде Заев но кажа и дека бомбите нема да испарата и дека СЈО веќе има собрано и материјални докази врз основа на прислушуваните разговори.
ЕУ бара Законот за Јавното обвинителство да се донесе до крајот на март, до кога треба да бидат изгласани и останатите реформски закони од Планот 18.
На новинарско прашање дали ќе се исполни рокот што го постави ЕУ , Мицкоски рече „никогаш во животот не сум прифатил рок или ултиматум“.
Во однос на претседателските избори Заев и Мицкоски договориле „оперативна соработка на двата тима на претседателсксите кандидати“.
„Сега немам гаранција дека процесот ќе биде фер и демократски, но затоа беше оваа средба Владата да може да се коригира и така ќе добиеме ден фер, демократски и идниот претседател ќе биде Силјановска – Давкова“ рече Мицкоски.
„Разговаравме најпрво за она што и е важно на опозицијата за изборите да бидат кристално чисти. Тоа е важно и за нас – овие избори на кои сме фаворити со Стево Пендаровски да бидат фер. Отворивме и разговор ако може ЕУ да обезбеди дополнителен мониторинг за одредени избирачки места“ кажа заев.
И двајцата се согласија дека е добро што дијалогот продолжил за релаксирање на односите, помирување и за кредибилен изборен процес.