Ахмети е искусен и мудар политичар вели Мицкоски пред утрешната средба на двајцата лидери. Тој во интервју за емисијата „Само вистина“ на Канал 5 вели дека очекува ова да биде почеток на ново пријателство.
,, Ахмети е искусен, мудар политичар. Јас како помлад можеби и ќе научам или ќе извлечам некоја позитивна специфика од тој разговор. Апсолутно го почитувам и како политичар и како човек. Знам дека од тој разговор можеме само да извлечеме и двајцата позитивен бенефит и за нашите партии и за Република Македонија. Очекувам конструктивен и содржаен разговор на двајца пријатели кои сега се запознаваат и се надевам дека ова ке ни прерасне во пракса и во идинина ке имаме почести состаноци“ вели Мицковски.
Мицкоски вели дека не го смета ДУИ за свој политички непријател, посебно по одлуката на партијата да не коалицира со ВМРО ДПМНЕ по предвремените парламентарни избори во декември минатата година.
„Не го сметам за непријател, како политички противник можеби, бидејќи е дел од владата на која ние сме и политички противници “ објаснува Мицкоски.
Според аналитичарите, ваквата промена на реториката од ВМРО ДПМНЕ е рефлексија на позицијата во која се наоѓа партијата.
,,Ова е рефлексија на нивните капацитети за коалицирање , кои се реално редуцирани можеби на нула. И мислам дека ова е во тој правец, тој се труди да го подигне овој капацитет на партијата со која раководи, што го утврдиле и тие како проблем“ вели аналитичарот Алберт Муслиу.
„Не очекувам по утрешната средба да излезе некоја голема љубов, но ова е паметен потег, кој не треба да заврши само со вакви изјави“ вели Муслиу.
Муслиу вели дека е нејасно како би можеле да се договорат околу законот за јазици за кој ВМРО ДПМНЕ има поднесено повеќе од 35 000 амандмани, а ДУИ одбива било какви интервенции.
„За нас законот за јазици е завршена работа, со кои се согласија и од ВМРО ДПМНЕ на 29 јануари“ велат од ДУИ.
Од партијата на Ахмети велат дека на средбата со Мицковски воопшто нема да го отворат прашањето за законот за јазици.
Тие велат дека ќе се разговара за преговорите за спорот за името и за реформите кои треба да бидат усвоени од Собранието, а за кои е потребно двотретинско мнозинство.
Средбата ќе се одржи во седиштето на ВМРО ДПМНЕ. Ова е прва средба меѓу Ахмети и Мицкоски по изборот на новиот претседател на ВМРО ДПМНЕ.