Идната влада на ВМРО-ДПМНЕ во четиригодишниот мандат ќе реализира капитални инвестиции за развој во вредност од преку две милијарди евра и ќе испорача проекти во вредност од над четири милијарди евра преку странски и домашни инвестиции, вети лидерот на партијата, Христијан Мицкоски на денешниот партиски собир „Обновата доаѓа“ во Скопје.
„Тоа јас го ветувам и се обврзувам на осмислени и реализирани проекти за економија со брз раст“, рече Мицкоски и додаде дека идната влада на ВМРО-ДПМНЕ ќе вложи една милијарда евра за заштита на животната средина.
Не можам да ви ветам, посочи, дека веднаш ќе почне да дува чист алпски воздух, бидејќи тоа е невозможно, но можам да ветам најмалку 50 отсто почист амбиентален воздух за македонските граѓани, порача претседателот на ВМРО ДПМНЕ, Мицкоски пред присутните во СЦ „Јане Сандански“.
Вети инвестиции во образованието од преку една милијарда евра, најмалку еден универзитет на Шангајската листа, нови болници и амбуланти и инвестиции во медицинскиот кадар во вредност од две милијарди евра, специјален пакет за земјоделците и редовна исплата на субвенциите, итн. И сето тоа, како што кажа, е за младите да останат тука.
Денот на избори (12 април) го оцени како ден на одговорот, македонски референдум и ден „Д“ кога народот одлучува. Мицкоски потенцира дека е сигурен во победата на ВМРО-ДПМНЕ на претстојните избори, не само поради резултатите на анкетите, туку бидејќи го познава народот и верува во него. Проблемите, порача, немаат ниту вера ниту нација, тие се заеднички затоа што и тешкиот живот е заеднички.