„Убеден сум дека кандидатот на ВМРО ДПМНЕ ќ биде претседател на државата“ кажа пред почетокот на партиската конвенција Христијан Мицкоски.
„Среќен сум што изминавме еден транспарентен и демократски процес во рамките на партијата. Имаме повеќе од задоволителен број на кандидати, девет на број. Имаа можност во изминативе неколку недели да се претстават себеси и својот поглед на иднината на Р. Македонија како нејзини претседатели. За разлика од она што го гледаме кај нашиот политички конкурент, оној деспотизам што за жал владее сѐ уште од времето на транзицијата по декрети да се номинираат претседатели, кандидати и функционери, ВМРО-ДПМНЕ покажа дека е лулка на демократијата, столб и пример како треба да се одвива една демократска процедура за избор на кандидат“ рече Мицкоски и додаде дека „СДСМ ќе заврши во сопственото црнило“.
Партиската конвенција се одржува во Струга – кандидирани се 9, но битката за гласови ќе се води меѓу Владимир Ѓорчев и Гордана Силјановска.
За избран кандидат, според деловникот на партијата, се смета оној кој добил најмногу гласови, но не помалку од една третина од вкупниот број делегати. Доколку ниту еден од кандидатите не го добие потребниот број или кандидатите добијат ист број гласови, гласањето се повторува.
Во повтореното гласање учествуваат двајцата кандидати, кои добиле најмногу гласови на првото гласање, при што за избран ќе се смета кандидатот кој добил најмногу гласови на повтореното гласање.