Прашање е дали Мицкоски е свесен за одговорноста за изговорениот збор или скриена наредба. Кој е поодговорен, тој што издал наредба да се убие или толпата што убива ? „Мочуриште“ „Лешинари“ „Глодари“ и „Полноглавци” се дел од вокабуларот на овој премиер.
Жанета Ќосе
Кој е одговорен за смртта на жртвата од трениран пес, песот што убил или сопственикот кој што му ја дал наредбата да убие? Дилемата на американските научници, на правните теоретичари од англосаксонскиот правен систем, е поставена пред секој граѓанин, а особено пред претставниците на власта.
Слободата на изразување во англосаксонското право се практикува без ограничување на слободата на мислата, но потоа се бара одговорност за секој изречен збор, со кој што се повредило, па дури и да се ограничило некое право на граѓанинот.
Во европскиот правен поредок се внимава и на превенирање на евентуален говор на омраза. Обвинувањата за цензура не се релевантен фактор ако станува збор за превентивна забрана со цел да се спречи насилство од омраза. А лекс специалис е Европската конвенција за човекови права и слободи, што ја ратификувала и чиј член е и нашата држава. И согласно правните принципи, еднаквата и еднообразна примена на законите обезбедува севкупност на правото, еднаквост на луѓето пред законот и правна сигурност.
Легислатива има, но не се почитува. Од правен аспект, радикалните форми на неприфатлив говор во кој отворено се повикува на насилство врз одредени социјални групи е најкратката формулација за објаснување на терминот говор на омраза.
Постојат неколку дефиниции за говор на омраза, но во евопскиот правен поредок најприфатена е таа од препораката на Комитетот на Советот на Европа: Говорот на омраза ги вклучува сите форми на изразување кои шират, поттикнуваат, промовираат или оправдуваат расна омраза, ксенофобија, антисемитизам или други форми на омраза засновани на нетолеранција, вклучувајќи и нетолеранција изразена во форма на агресивен национализам и етноцентризам, дискриминација и непријателство кон малцинствата, мигрантите и луѓето од имигрантско потекло“.
„Мочуриште“ „Лешинари“ „Глодари“ и „Полноглавци“ се епитети кои што во последно време се дел од вокабуларот на овој премиер. Од правен аспект со навредлив речник се служат поединци на раководни позиции кои што имаат намера да навредат и да виктимизираат одредени целни групи или граѓани кои се закана за нивните функции и привилегии.
Тенка е границата меѓу слободата на изразување и говорот на омраза. Избраната жртва кон која е насочен говор на омраза е навредуван и жигосуван како поединец. Кон него е посочено со прст со намера да се прикаже како одговорен за нечија грешка, поточно кој е избран да му се префрли вината за злодело извршено од друг, вообичаено од моќен поединец, со цел да се пренасочи вниманието кон избраната целна група или поединец.
Анализирано од социолошки аспект ваков наратив користат луѓе од позиција на моќ, кои толпата од лојални клиентелисти слепо ги слуша и ги извршува јавните линчови на избраните жртви.
Злоупотребата на моќта, во одделни случаи обезбедена и преку тргување со влијание, резултира со насилство поттикнато од зборот. Од психолошки аспект, пак, виктимизцијата и говорот на омраза се производ на безмилосното газење врз жртвите, што може да се окарактеризира како крволочност. Станува збор за луѓе кои ги имаат сите симптоми на нарцисоидност, но во негативна смисла на зборот, поточно за синдромот Хомо балканикус дополнет со огромна желба да се задржи власта по секоја цена. Психолозите би се согласиле дека станува збор за хранење на големото его и суета на моќници, кои газат врз живи луѓе за да ги реализираат зацртаните цели за позиции и фотелји.
Прашање е дали Мицкоски е свесен за одговорноста за изговорениот збор или скриена наредба. Кој е поодговорен, тој што издал наредба да се убие или толпата што убива?
Од Фејсбук ѕидот на авторката