Во периодот кој следи ќе продолжат консултациите со експертите и со јавноста околу тоа каква форма ќе биде референдумот, дали задолжителна, консултативна. Кога би се одржал, кој би го поднел, дали пратениците дали тоа ќе бидат граѓани, дали ќе биде претходен или последователен, дали ќе се однесува на преговарачката рамка или на делот на преговарачката рамка кој се повикува на билатералниот договор со Бугарија, рече денеска лидерот на ВМРО-ДПМНЕ, Христијан Мицкоски на прес-конференцијата пред одржување на Годишно собрание на партијата Демократски сили на Ромите (ДСР).
Мицкоски демантира дека се соочуваат со внатрепартиски проблеми и оцени дека само референдумот може да покаже чии ставови се искрени.
„ВМРО-ДПМНЕ е обединето, цврсто како никогаш досега, очекуваме историски голема победа на изборите, СДСМ очекува историски рекорден пораз“, изјави тој.
За Мицкоски е загрижувачки тоа што одредени партии во опозицијата не се критички настроени кон власта, што, според него, остава сомнеж за тоа дали навистина треба да се идентификуваат како опозициски.
„Има една чудна состојба, а тоа е противници на ваквото референдумско изјаснување на граѓаните е власта и оние инсталации на власта во опозицијата. Тоа е една чудна ситуација која ги обединува тие инсталации на власта во опозицијата и самата власт“, рече Мицкоски.
Запрашан дали при тоа мисли на опозициските партии на Албанците, Мицкоски истакна дека досега не го чул нивниот став по однос на идејата за референдум.
„Јас не сум слушнал став на партиите на Албанците во опозиција, но после тоа што го поддржаа оној лист хартија во Парламентот, имам дилема дали воопшто се во опозиција. Имам дилема каде припаѓаат тие, затоа што за да се идентификуваат како опозиција треба да се критички настроени кон постапките на власта“, изјави лидерот на ВМРО-ДПМНЕ.
Според него, огромно мнозинство на граѓани без разлика на етничката припадност „се согласни да има референдум“.
„Огромно мнозинство граѓани се за референдумско изјаснување, бидејќи ова е од суштинско значајно за граѓаните. И повторно ќе кажам, македонската јавност да биде мирна, да бидат спокојни, бидејќи пратениците на ВМРО-ДПМНЕ заедно со неколкумина останати пратеници во Парламентот се чувари на идентитетот“, рече Мицкоски. (Р.Н.)