Резолуцијата за дефинирање на македонските црвени линии во однос на спорот со Бугарија не треба да поттикнува поделба, иако резултира на недоверба во самиот процес. Ова во гостување на ТВ Алфа го кажа пратеничката од редовите на ВМРО-ДПМНЕ, Рашела Мизрахи. Таа потврди дека автори на самата Резолуција се МАНУ, УКИМ, додека формата ја дала пратеничката група на ВМРО-ДПМНЕ.
– За мене е очекувано да биде оваа Резолуција прифатена од СДСМ. На пример, како би звучело во предизборие на локални избори да кажуваат дека биле против Резолуција која што вели – ‘Македонскиот јазик и неговите дијалектни разновидности имаат свој просторен и временски континуитет’. Како ќе бидете против ова?, рече Мизрахи во емисијата „Што не е јасно“ на ТВ Алфа.
Од СДСМ, пак, рекоа дека се подготвени да ја прифатат на предлог-резолуцијата, за исцртување на црвените линии за спорот со Бугарија.
– Во рамки на парламентот ние како конструктивно парламентарно мнозинство без никаков проблем може да направиме таков чекор и ќе ја прифатиме резолуцијата таква каква што е каква што и всушност видовме од медиумите затоа што официјален предлог до нас како пратеници нема. Значи согласно Уставот ВМРО-ДПМНЕ треба официјално до секој пратеник да ја испрати резолуцијата, секако ние како одговорно мнозинство ќе ја прифатиме таква каква што ја гледаме во медиумите, рече Костадин Костадинов пратеник и портпарол на СДСМ.
Партијата Демократски сојуз, која е дел од коалицијата на СДСМ, денеска соопшти дека собранието треба да донесе резолуција со која ќе се упати јасна порака до Европската Унија и соседите дека никој нема право да го оспорува македонскиот национален идентитет, неговиот историски континуитет, како и јазикот. Од партијата додаваат дека очекуваат текстот од актуелниот предлог да се подобри. Резолуцијата е прифатлива за ДОМ и за ЛДП.