Од увидот во медицинската документација, пациентката немала хронични заболувања, освен дебелина, а немала примено вакцина против ковид-19.
Пациентка на 33 годишна возраст, која синоќа била хоспитализирана со потешкотии во дишењето, починала утринава на Инфективниот оддел во Клиничката болница во Битола.
Директорката на оваа установа, д-р Биљана Гагачовска, за НОВА ТВ изјави дека пациентката била примена како сомнителна на ковид-19, но немала тест дали е инфицирана со вирусот.
– Не можеме да кажеме дали била заболена од коронавирусот, бидејќи за тоа нема никаков податок. Кај нас доцна синоќа оваа пациентка била хоспитализирана како сомнителна, но непотврдена за инфекција со ковид-19, бидејќи, според податоците, таа не била тестирана. При приемот, таа имала големи потешкотии во дишењето и ниска сатурација, а настапило нагло влошување на состојбата и лекарите веднаш пристапиле кон реанимација. За жал, настапила ненадејна и брза смрт, па дежурните лекари побарале и судско-медицинска обдукција, изјави д-р Гагачовска.
Од увидот во медицинската документација, пациентката немала хронични заболувања, освен дебелина, а немала примено вакцина против ковид-19.
Д-р Гагачовска повторува граѓаните да се придржуваат кон превентивните мерки за заштита од ковид-19 – да се вакцинираат против вирусот, да држат дистанца и да избегнуваат присуство на настани со повеќе луѓе.
(Љ.Б.)