Министерството за надворешни работи преку интерен повик објавен пред два дена бара 17 кандидати за амбасадори за местата кои се уште не се пополнети, но и за оние позиции кои ќе се ослободат во текот на 2022 година, потврдија за Нова ТВ од МНР.
Целта на интерниот повик, како што велат во ресорното министерство, е да се добијат сознанија кои дипломати во МНР се заинтересирани за дипломатската служба за да се пополнат празните позиции после подолг период.
– Интерниот повик за пројавување интерес за позицијата вонреден и ополномоштен амбасадор на Република Северна Македонија, за вкупно 17 амбасадорски места кои се моментално непополнети или се испразнуваат во текот на 2022 година е објавен на внатрешната страница на министерството, на 18 јануари 2022година. Целта на интерниот повик за пројавување интерес е преку транспарентен и инклузивен начин да се добијат сознанија и јасна слика за професионалните дипломати во министерството кои ги исполнуваат условите, а воедно се заинтересирани за пополнување на овие позиции, вели Анеса Салиху, портпарол во МНР за Нова ТВ.
Овој повик, како што објаснуваат од МНР, нема обврзувачки карактер и е дел од менаџирањето со човечките ресурси со кои располага министерство.
Министерот за надворешни работи Бујар Османи, како што пренесовме утрово, најави дека за неколку дена ќе има и предлог за амбасадор во Бугарија.
Според Османи грешка е што во текот на овие години Македонија немала амбасадор во Бугарија, но изрази надеж дека овој проблем ќе се реши.
Инаку, последниот амбасадор на Македонија во Бугарија беше Марјан Ѓорчев чиј мандат заврши на крајот на март 2020 година.
Османи и минатиот месец најави дека очекува до средината на јануари да бидат пополнети сите испразнети амбасадорски места. Решенијата за овие амбасадорски места, како што најави министерот, ќе бидат готови веднаш по формирањето на новата влада.
Тој рече дека ќе бидат пополнети амбасадорските места во Индија, Италија, Русија и Австрија, а дека претходно се испратени повеќе од 10 амбасадори и дека се прават напори да се заокружи дипломатската служба со потребниот кадар.
С.М.