Утрово околу 4 часот, четири маскирани лица фрлиле со молотови коктели врз Музејот на албанската азбука во Битола. Директорот Нуер Арслани за порталот СДК.мк потврдил дека лицата сакале да го запалат објектот, но не успеале.
– Музејот беше нападнат со молотови коктели од четири маскирани лица. Се обидоа да го запалат, но за среќа не успеаја. Ги искршија само стаклата, изјави Аслани.
Напаѓачите се снимени од камера поставена на објектот. Снимката е дадена на битолската полиција.
Инцидентот го потврдуваат и од СВР Битола, според чии првични информации, од молотовите коктели оштетени се влезната врата и прозорецот на вториот кат од Музејот, како и спомен-плочата на Музејот.
Повеќе детали околу истрагата ќе бидат соопштени по добивањето на конкретни информации, потврди Сања Стаматова, портпарол на СВР Битола.
Во ноември лани, непознати лица кои се уште не се открени ги искршија прозорците на Музејот и залепија налепници како на двоглав орел со сабја му се сече главата.
Партијата ВМРО-ДПМНЕ го осуди инцидентот и оценуваат дека се работи за изолиран случај кој мора да биде осуден од страна на сите со цел да се спречи евентуална негова злоупотреба за партиски и политички цели.
– ВМРО-ДПМНЕ смета дека негувањето на историјата и културата на секој народ е суштествено право и особено значаен елемент на едно мултикултурно општество какво што е македонското. Ги повикуваме надлежните органи побрзо да го расветлат случајот и виновниците да бидат санкционирани, се вели во партиската реакција.
Оттаму потенцираат дека овој инцидент бил обид на одредени сценаристи да предизвикаат дефокусирање од актуелните политички случувања во државата.
Инцидентот го осудија и од СДСМ и очекуваат надлежните органи во најбрзо време да го расветлат случајот.
– Предупредивме дека насилството и омразата поттикнати лично Никола Груевски и поддржани од Ѓорге Иванов водат кон штетни и опасни последици по граѓаните и по Република Македонија. Мнозинството граѓани на изборите на 11 декември се изјаснија против политиките на поделби, изолација, омраза и нетрпеливост на досегашната власт и избраа заеднички живот во едно општество за сите, се вели во соопштението од СДСМ.
Од оваа партија, сметаат дека оттука „произлегуваат сценаријата што имаат за в=цел да предизвикаат конфликт и судир помеѓу граѓаните и да ја продлабочат политичката криза во Македонија со цел да се спасува Никола Груевски со соработниците од одговорност за криминалите – нема да успеат!“
Претседателот на Република Македонија Ѓорге Иванов најостро го осудува денешниот инцидент во Битола. Во соопштението од неговиот кабинет се наведува дека тој верува дека ова е изолиран случај и повикува инцидентот да не се злоупотребува за партиски, политички цели и за манипулација на јавноста.
Тој апелира и до секој поединец да се однесува одговорно и да ги има предвид можните последици од ваквите инциденти.