Министерството за образование и наука (МОН) набави таблети за ученици од четврто одделение од семејства во социјален ризик и истите ги дистрибуира до училиштата. МОН информира дека од вкупно 10 000 уреди, досега се подигнати 3000.
Со набавувањето на оваа опрема, училиштата се подготвуваат за новата учебна година со која во пракса започнува и имплементацијата на новата образовна Концепција за основно образование. Со новата Концепција се предвидува осовременување на образовниот процес, односно учениците од прво и четврто одделение ќе учат по целосно нови наставни програми и од нови материјали за учење, чија подготовка е во завршна фаза, наведува МОН.
Новина во наставата во четврто одделение е што предност ќе им се даде на дигиталните учебници, кои ќе бидат само една алатка повеќе за успешно совладување на материјалот. За таа цел, МОН посочува дека обезбеди таблети кои се наменети за учениците од социјално ранливи семејства.