Министерството за образование и наука по писмен пат и без никакво образложение им го прекина правото на користење на субвенциониран студентски оброк на дел од студентите, иако претходно биле во групата на која и било одобрено негово користење.
Во мејловите кои им се испраќани на студентите е наведено дека Комисијата за остварување на правото на субвенциониран студентски оброк за редовни студенти извршила проверка во податоците добиени од страна на Управата за јавни приходи и Агенцијата за вработување во РСМ при што било утврдено дека не го исполнуваат правото за субвенциониран студентски оброк.
Оваа одлука на МОН предизвика бурни реакции кај студентите кои по пат на коментари на социјалните мрежи го изразуваат своето незадоволство.
„Ова е веќе лажно и смешно, ако е некој неспособен да си ја работи работата за која е поставен или нека научи или нека стане од столот. За 2400 денари два месеци ги лажете студентите.“ – реагира млада студентка.
„Срамота за Министерството за образование и наука! Прво добиваме мејл со кој ни се одобрува студентски оброк, а денес еве дека повеќе немаме никакво право на него. Ќе профункционира нешто во државава или потешко!?“ – коментира студент.
Студентка од Филолошкиот факултет „Блаже Конески“, Ивана Ракиџиев за Нова Тв вели дека без никаква причина и е ускратено правото за субвенциониран студентски оброк, иако ги исполнува условите за истиот.
„Немам стапено во никаков работен однос и немам никакви приходи. Едноставно бев одбиена без причина иако ги исполнувам сите услови и претходно веќе ми беа испратени средствата за септември.“ – вели Ивана Ракиџиев, студентка.
Дел од студентите на социјалните мрежи,сметаат дека одлуката за укинување на правото на субвенциониран студентски оброк се должи на изборниот резултат што го освои владејачката СДСМ на локалните избори.
„Не сте гласале точно.“ – коментира студент.
„Завршија изборите, мета се студентите. Срамота!“ – реагира студентка.
Од Универзитетското студентско собрание – УКИМ велат дека се запознаени со необразложеното укинување на правото на студентски оброк и се подеднакво збунети и лути во однос на оваа одлука на МОН.
„Исконтактиравме со МОН и ни го одговорија следново: Испратете име, презиме, матичен број и барање за образложение зошто сте одбиени и да се разгледа одлуката повторно бидејќи сметате дека ги исполнувате условите на следниов меил: subvencioniran.obrok@mon.gov.mk“
За Радио МОФ од МОН информираат дека не станува збор ниту за системски ниту за технични проблем, туку дека повеќе студенти аплицирале од еден ист мејл.
„На повеќе од 70 студенти им е стигнато известување дека се одбиени, бидејќи мејлот им се води на друго лице и од тие причини се известени дека им се укинува, а во суштина тие ги исполнуваат условите. Проблемот е што повеќе студенти аплицирале од еден ист мејл. Некои коишто добиле известувње дека се одбиени, веќе ги добиле средствата, уплатени им се на сметка.“ – велат од МОН за Радио МОФ.
Марија Поповска