Министерството за образование не ја исклучува можноста зимскиот распуст да започне порано поради загаденоста на воздухот, објавува факултети.мк.
Тие додаваат дека активно ги следат состојбата и препораките на надлежните институции.
– Ако се утврди потребата, ќе размислиме за предвремено почнување на зимскиот распуст. Сепак, секој прекин на наставата мора да биде надоместен. Така, доколку зимскиот распуст почне порано, неработните денови би морале да се одработат и учебната година би завршила подоцна од 10 јуни. Или учениците би одработувале викенди во текот на второто полугодие затоа што вкупниот фонд на наставни денови мора да биде 180 за да се реализира фондот на предвидени часови, велат од МОН.
Сепак од Министерството велат дека и покрај тоа што се свесни за овој голем проблем, нема да дадат поддршка на најавениот бојкот на наставата за в среда.
-Поддршка на иницијатива за бојкот на настава не можеме да дадеме од проста причина што тоа е на штета на наставниот процес. Сепак, Законот предвидува дека училиштето ќе мора да изнајде начини за да го реализира фондот на предвидени часови по соодветните наставни предмети, како и вкупниот број 180 наставни денa, велат од МОН за Факултети.мк.
И од Првата детска амбасада Меѓаши бараат под итно децата да се пуштат на распуст, а помалите деца да не се пуштаат во градинките.
-Имајќи ја предвид енормната загаденост на воздухот и неговото катастрофално влијание врз здравјето, бараме од централната и локалната власт под итно децата да се пуштат на распуст а градинките и сите установи каде престојуваат деца да се затворат се додека концентрацијата на ПМ 10 и ПМ 2,5 честичките се намали во нормални граници и се додека од надлежните институции не се преземат соодветни, конкретни мерки за заштита, велат од Меѓаши.
Во спротивно најавуваат дека ќе се придружат и ќе дадат целосна поддршка на веќе најавениот бојкот на наставата од страна на родителите, за 20 декември 2017.
Владата вчера објави итни мерки ако воздухот е загаден два дена по ред.