Монгкол Бунпијам е името на едно од четирите момчиња кои беа спасени од пештерата во Тајланд во денешната меѓународна спасувачка мисија.
Мајката на момчето која од синоќа стоела пред пештерата во која се заробени младите фудбалери, за Гардијан изјави дека е пресреќна што нејзиниот 14 годишен син најпосле е спасен.
„Само го слушнав неговото име, Монгкол и многу се израдував. Не знам што да му кажам. Чекајте прво да го видам“, раскажува мајката на момчето.
Во меѓу време, светската фудбалска федерација ФИФА ги покани децата и спасувачите од Тајланд на финалето од Мундијалот што треба да се одржи на 15 јули во Москва.
Претседателот на ФИФА, Џани Инфантино испрати порака со поддршка и изрази надеж дека младите фудбалери од тимот на „Диви свињи“ ќе бидат спасени до почетокот на финалето на Светскиот куп.
„Ако тие им се вратат на семејствата, како што сите ние се надеваме, и ако здравјето им дозволи да патуваат, ФИФА ќе биде воодушевена и ги кани да бидат наши гости да го проследат финалето на Светскиот куп 2018. Се надевам дека ќе бидат способни да ни се придружат во финалето, што несомнено ќе биде прекрасен момент за фудбалската заедница и ќе биде момент за славење“, напиша Инфантини во поканата испратена до Фудбалската федерација на Тајланд.
Четири од 12 момчиња и нивниот тренер беа извлечени денеска во операција што траеше осум часа, откако поминаа две недели во пештерата. Тие веднаш беа пренесени во болница, во близина на Чианг Рај.
Спасувачката операција ќе продолжи утре.