Во Кривичниот суд во Скопје денеска почна повторното судење за случајот „Монструм“ против обвинетите за петкратното убиство кај Смилковското езеро во Скопје на 12 април 2012 година.
Судењето стартува од почеток, бидејќи Врховниот суд ја укина првостепената и второстепената пресуда и предметот го врати од почеток, и тоа по барање на Вишото јавно обвинителство.
Судскиот процес, кој го води судијата Огнен Ставрев, денеска почна со читање на обвинителниот акт.
Обвинителот Наум Пановски рече дека остануваат на првичниот обвинителен акт, со кој обвинетите се товарат за тероризам.
Шест лица беа осудени во „Монструм“ на казна доживотен затвор под обвинение за тероризам.
На обвинителна клупа денеска се четворица обвинети, додека првообвинетите Алил Демири и Африм Исмаиловиќ по кои има меѓународни потерници со години се во бегство во Косово.
Одбраната верува во позитивен епилог.
–Постои опција СЈО да го преземе случајот бидејќи тоа се уште го истражува случајот а и не е одлучено кој од обвинителите од организираниот криминал ќе го презентира, па мислам дека постои и оваа опција. Ако нема одложување од техничка природа, условно, мислам дека за четири седници ќе се затвори случајот во прв степен. Случајот наскоро ќе има епилог, изјави адвокатот Насер Рауфи пред судењето.
Роднините на осомничените се надеваат на нивно целосно ослободување од вина. Тие веруваат дека доказите кои ги поседуваат двете обвинителство ќе ја потврдат невиноста на шесте осомничени лица.
„Сметам дека треба што побрзо да се донесе пресуда за да се ослободат конечно. Тие се уште се затворени бидејќи им се поставени ограничувања. Не дека јас сакам по секоја цена да биде во полза на нашите семејства, но сакам судењето да биде во полза на правдата. Се надевам и апелирам до јавното и до специјалното обвинителство да ги соединат доказите и да излезат со став и сторителите на делото да ги изнесат пред закон“, вели роднината Бедри Хајдари.