Во функција на спроведување фер и слободни избори во Република Македонија, Граѓанската асоцијација МОСТ за набљудување на изборниот процес и денот на гласањето ќе ангажира околу 2000 набљудувачи на целата територија на Република Македонија.
МОСТ ги повикува граѓаните, лично да се пријават во 18те регионални канцеларии низ целата држава, кои ќе бидат отворени од 10 до 17:30 часот, а контакт информации за регионалните канцеларии можат да се најдат на интернет страницата на МОСТ.
За пријавените граѓани ќе биде организирана специјална обука, а истите потоа ќе бидат распоредени на гласачките места како набљудувачи.
Набљудувач во мисијата на Граѓанската асоцијација МОСТ може да биде секој граѓанин со право на глас, кој е подготвен непартиски, непристрасно и објективно да го набљудува процесот и да известува за наодите. При селектирањето на набљудувачите предност ќе имаат оние кои во веќе биле ангажирани како набљудувачи на МОСТ на претходните изборни процеси.
Во рамки на проектот активна е и интернет платформата http://neregularnosti.most.org.mk, каде што граѓаните ќе можат да ги пријават сите евентуални нерегуларности. Дополнително, отворена е и e-mail адреса: neregularnosti@most.org.mk.
Повторно е активна и бесплатната телефонска линија 080 080 080.