Нова пандемија би можела да започне во следните две децении, смета милијардерот и ко-основач на Мајкрософт, Бил Гејтс во интервју за Диарио. Според Гејтс има 50 отсто шанси таа да се појави во следните 20 години и дека нејзиното потекло веројатно ќе биде природно.
„Тоа може да биде вирус направен од луѓе, кои ќе го развијат и намерно ќе го шират. Или може да биде нешто што доаѓа од природниот свет. Човечката популација расте и ние навлегуваме во се повеќе екосистеми. Затоа предвидувам дека има 50 проценти шанси да имаме нова пандемија од природно потекло во следните 20 години, како резултат на климатските промени“, рече Гејтс.
Гејтс, кој неодамна ја објави книгата „Како да се спречи следната пандемија“, објасни дека следната пандемија може да биде грип, нов тип на вирус од семејството на коронавирус, па дури и вирус направен од човек, кој тој го нарече „многу застрашувачко сценарио“.
За борба против пандемијата, Гејтс предлага да се создаде „глобален тим за одговор на епидемијата и за мобилизација. Тоа ќе бара зголемување на буџетот на СЗО за 25 отсто и создавање на тим од околу 3.000 луѓе од различни профили“, смета тој.
Гејтс верува дека ако ширењето на болестите може да се стави под контрола, нема да бидат потребни вакцини.
Одговарајќи на прашањето за мајмунските сипаници, Гејтс смета дека тие нема да ја предизвикаат следната пандемија.
„Да не беше пандемијата на корона вирусот, мајмунските сипаници немаше да бидат на вестите“, рече тој.