Директорот на Музејот на современата уметност – Скопје, Лазе Трипков, претстави 21 проект, одобрени од Министерство за култура на Р М.
„2017-та ја започнавме со изложбата на „Ничија Земја“ на Стоун Дизајн со која беше претставена Македонија на Биеналето за архитектура во Венеција, после која ќе следи големата изложба на еден од најистакнатите македонски уметници, Петар Хаџи Бошков.
В0 2017-та ќе бидат реализирани:
Керамика – избор на делата од колекцијата на применета уметност во МСУ.
„Кале културна тврдина 2“
- Меѓународно биенале на млади уметници со наслов IN BETWEEN
Самостојна изложба на Велимир Жерновски „Преку црнилото/ релативна поставеност на земјата.“
„Миграции“ – меѓународна изложба
„Линеарниот цртеж низ призмата на македонската современа ликовна уметност“
„Македонска разгледница од колекцијата на МСУ
Жанета Вангели „Архив 1987 – 2017“
„Професија фоторепортер: Историја на документарната и репортажната фотогрфија во Македонија 1945 – 2016“, вели тој.
Од оваа година директорот го најави циклусот „Заборавените“ – кој ќе ги опфати уметниците кои творат надвор од нашата земја. Овој циклус започнува со ретроспективната изложба на Михајло Арсовски, основач на хрватската дизајнерска сцена.
– Исто така ќе организираме, форуми и работилници. Во подготовки сме, со форумот кој ќе има за цел да воспостави регионално поврзување со музеите и размена на искуства со колекциите кои ги поседуваат и проблемите со кои се соочуваат.
Во април ќе започнеме со доопремување во четвртата сала (светла,изработка на паноа), која ќе овозможи изложување на поголем број од најмаркантите дела од колекцијата на МСУ.
Во првата сала на катот, ќе биде отворен центарот за едукација како и библиотеката која по подолго време ќе биде повторно достапна за јавноста.
Киното повторно ќе биде во функција, планирана е заедничка соработка со Македокс, како и програма со документарни филмови за нашите уметници и омажи на македонски режисери.
Тука е и конкурсот за кратки видеа и анимации за Музејот на современата уметност – Скопје, образложува Трипков.
Кустосот Благоја Варошанец, информираше за изложбата на 12 современи македонски уметници во галеријата МАНА во Њујорк, САД, меѓу кои Јован Шумкоски, Антони Мазневски, Жанета Вангели, Игор Јосиф.
Како и за Биеналето кое за прв пат ќе биде со меѓународен селектор – куратор: Јара Бубнова од Бугарија, еден од најискусните куратори во регионов. Ќе опфати географски регион плус со можност за идно проширување на земјите учеснички.
Исто така, започнува третата фаза, завршна од проектот за осовременување на депото, поддржан од Министерството за култура.
Анжелика Апсис, односи со јавност, информираше за првиот павиљон за млади кој ќе носи наслов „Солидарен павиљон за млади“, кој преставува солидарен гест на МСУ кон младите уметници, давајќи им можност да ги престават своите дела и да одржат работилници на теми кои најмногу ги засегаат.
– Исто така, понатаму ќе продолжиме со матинеата, кои се покажаа како одличен начин за неформално дружење и кои привлекоа најразлична публика.
Во февруари започнуваме и со концерти на современа музика. Чест ни е да го најавиме концертот на пијанистката Ема Попивода, кој ќе се случи на 14 февруари 2017 година.
Ја прошируваме содржината на нашата книжарница.Од сега во неа ќе можат да се најдат и парчиња накит од македонски дизајнери кои ќе креираат посебна линија за музејот.
За летните месеци најавуваме летно кино, под отворено, како и многу други содржини за кои ќе бидете благовремено информирани, дополни Трипков.