Тринаесет граѓани денеска се казнети од сообраќајната полиција бидејќи не ја почитувале забраната за движење со возила до Средно Водно, соопштиле за сдк.мк од МВР.
-До 13 часот казнети се 13 граѓани кои не ја почитуваат мерката за забрана на движење на возила на Водно за време на викендите и државни празници. Им беше изречена мерка за постапување спротивно на сообраќаен знак. Казната е 45 евра или 25 казнени бода. Сите граќани се казнети на потегот од центарот на Скопје кон Средно Водно. Во делот кај манастирот Свети Пантелејмон немаше граѓани кои со возила се упатуваа кон Средно Водно, велат од Министерството за внатрешни работи.
Град Скопје мерката за забрана за движење на возила кон Средно Водно ја воведе пред три недели, со цел заштита на парк шумата Водно. Оттогаш пуштени се две нови автобуски линии кои беспатно возат до Средно Водно, а исто така воведено е и бесплатно паркирање на паркиралиштата кај почетниците станици на линиите.
Минатиот викенд на Водно немаше полиција. Од МВР тогаш рекоа дека биле ангажирани за протестот на ВМРО-ДПМНЕ, а паркингот на Средно Водно беше полн со возила.
Градските власти потсетуваат дека денеска и за време на викендот граѓаните ќе имаат можност со автобус да се искачат до Средно Водно и да се рекреираат на чист воздух. На располагање им се двете нови пробни автобуски линии 25А и 25Б, како и постојната линија со број 25, кои за време на викендите и државните празници се бесплатни.
Град Скопје почнувајќи од 25 ноември годинава воведе забрана за движење возила на патот до Средно Водно, која важи секој викенд и за време на државните празници. Оваа забрана важи во еден правец, од клучката за Сопиште до Средно Водно и од паркингот кај манастирот „Свети Пантелејмон“ до Средно Водно.
За да им излезе во пресрет на граѓаните кои сакаат да се рекреираат на Водно, Град Скопје воведе две нови пробни автобуски линии што сообраќаат по принципот на шатл-линии, односно автобусите се полнат со патници на почетната станица и возат без застанување до Средно Водно.
Пробната линија со број 25А сообраќа на релација Автомакедонија (Стара железничка станица) – Средно Водно, по улицата „Свети Кирил и Методиј“, булеварот „Мајка Тереза“ и обратно. Пробната линија со број 25Б сообраќа на релацијата Дом на печат – Средно Водно, по улицата „Свети Кирил и Методиј“, булеварот „Мајка Тереза“ и обратно. Возењето на трите автобуски линии (25, 25А и 25Б) на почетокот ќе биде бесплатно. Град Скопје обезбеди и бесплатно паркирање во катната гаража на улицата „Свети Кирил и Методиј“ и на паркингот кај Цветен пазар (Дом на печат).
Градските власти потсетуваат дека од 9 до 16 часот е забрането движењето со возила до Средно Водно и оти непочитувањето на оваа забрана ќе се казнува според Законот за безбедност на патишта на Република Македонија, според кој висината на казната изнесува 45 евра во денарска противвредност.
Забраната за движење моторни возила до Средно Водно нема да се однесува на автобусите на ЈСП „Скопје“, возилата на полицијата, противпожарната бригада, итната медицинска помош, на штабовите за итни интервенции и на возилата со посебни одобренија.