Постариот брат на поранешната пратеничка од ДУИ, Ермира Мехмети, е осомничен дека поседувал оружје, кое како што соопшти полицијата е најдено во подрумските простории во зграда во населбата Чаир.
Во денешниот билтен МВР информираше дека оружјето било најдено завчера складирано во две кофи. А, полицијата за случајот била информирана по пријава, но засега не се откриваат други детали.
„При увидот на местото на настанот, во подрумските простории, пронајдени биле 19 гранати калибар 40 мм во реденик, 12 гранати 40 мм залепени со селотејп во картонска кутија, две рачни бомби кинеско производство, еден упаљач за рачна бомба, 25 куршуми маневарска муниција калибар 7,62 мм и 10 куршуми калибар 7.62мм боева муниција. Се работи на целосно расчистување на случајот“, пишува во денешниот полициски билтен.
Како што дознава НОВАТВ од полициски извори, братот на Мехмети се наоѓа дома, а со него полицијата извршила разговор и случајот го проследила до Јавното обвинителство.
„Известено е Јавното обвинителство, постапката трае и ќе бидете известени“ – изјави Агим Нухиу, министер за внатрешни работи од редовите на ДУИ.
Семејството Мехмети не сака да дава било какви коментари за случајот. Постариот брат на Ермира Мехмети е лице со хендикеп и со оштетен вид.
Акцијата на МВР и претресот на подрумот на братот на Мехмети, следува со доаѓањето на функцијата министер на Агим Нухиу. Ермира Мехмети повеќе не е дел од ДУИ. Таа на 30 декември минатата година поднесе оставка од сите функции во партијата и веќе не е активна во политичкиот живот.
„Почнувајќи од денес, јас, Емира Мехмети, сум слободен граѓанин и не ја претставувам ниту една партија. Сите симболи и политичката иконографија, почнувајќи од денес и во деновите што доаѓаат, ќе бидат отстранети од мојата официјална фан страна на Фејсбук“, напиша тогаш Ермира Мехмети.
Како што е веќе познато во јавноста, таа неодамна стана нотар, како и советник во австриското собрание.
Нејзиниот помал брат, Замир Мехмети, е еден од активистите на „Шарената револуција“, кој жестоко се бореше против аболицијата, одлуките на Уставниот суд, беше присутен на сите антивладини протести, но e и остар критичар на политиките на ДУИ и на ВМРО-ДПМНЕ