Инспектори од одделот за организиран криминал од Министерството за внатрешни работи по налог на јавен обвинител од Основното јавно обвинителство, минатата недела започнаа истрага за работењето на преходниот директор на Македонскиот народен театар (МНТ), режисерот Дејан Пројковски.
Од МВР за МИА изјавија дека е постапувано по налог на Јавното обвинителство, но не соопштуваат повеќе детали бидејќи станува збор за претдкривична постапка.
– По налог на Јавно обвинителство, од страна на Одделот за организиран криминал е постапувано во МНТ. Бидејќи станува збор за преткривична постапка во интерес на истрагата не може да се соопштат повеќе детали, велат од МВР за МИА.
Сомневањата се дека во периодот од 2015 до 2017 година во театарот се извршени злоупотреби од страна на претходното раководство предводено од директорот Дејан Пројковски.
Од Одделот за организиран криминал постапуваат по пријава на Министерството за култура, откако сегашната в.д. директорка на МНТ Симона Угриновска побарала да се изврши ревизија на работењето на претходниот директор.
Пројковски беше директор на МНТ од 2015-2017, а претходно четири години беше уметнички директор. Сега е вработен како режисер во МНТ.