Мисијата на ОБСЕ денеска во Тетово организираше работилница за обука на полицајци за справување со инциденти од омраза на која предавач, односно инструктор бил активистот Павле Богоевски, поранешен асистент на Факултетот за безбедност во Скопје и активен учесник во протестите на Шарента револуција.
За време на обуката дел од присутните полицајци јавно искажале забелешки за учеството на инструкторот Богоевски на протестите на Шарената револуција, но по кратката дискусија на таа тема, обуката продолжила според планираната агенда.
Од МВР доцна попладнево во реакција велат дека револтот кај службениците е оправдан, а Мисијата на ОБСЕ во Скопје во иднина да прави проверки кого ангажира.
-МВР изразува жалење за скандалот што се случи, но револтот на полициските службеници кои го искажале со напуштање на просторијата е разбирлив со оглед на фактот што во улога на предавач односно инструктор се јавува лице кое секојдневно ја напаѓа и навредува полицијата.
Министерството за внатрешни работи јавно апелира до Мисијата на ОБСЕ во Скопје во иднина да прави проверки кого ангажира, бидејќи е неприфатливо лица кои нанесуваат штети од стотици илјади евра, кои рушат споменици, ја напаѓаат и навредуваат полицијата во исто време да бидат и нејзини едукатори.
Досега Министерството за внатрешни работи и Мисијата на ОБСЕ во Скопје имаа долгогодишна и бездруго, повеќе од успешна соработка со голем број на реализирани проекти, работилници и обуки кои се надеваме дека ќе продолжат и во иднина, се вели во соопштението на МВР.
Богоевски, кој е поранешен асистент на Факултетот за безбедност во Скопје и поранешен ментор во Полициската академија, бил избран од страна на партнерот за имплементација на проектот, Хелсиншкиот комитет, за да одржи презентација во врска со мапирањето на случаите на кривични дела од омраза – велат за медиумите од мисијата на ОБСЕ во Скопје.