Трансплантацијата на органи во земјава е еден од приоритетите на Министерството за здравство и на Владата. Во финална фаза е изработката на Национална листа за трансплантација на бубрег што треба да биде готова до крај на месецот на листата и на неа ќе има повеќе од 150 хла типизирани пациенти на дијализа кои имаат потреба од бубрег. Националната листа е изработена по примерот на Еуротрансплант и се прави за првпат во државава, соопштуваат од Министерството за здравство.
Од таму посочуваат дека веќе се склучени договори за соработка со болници од Израел и од Турција, а се водат преговори за соработка и со центри во Словенија, Хрватска и Австрија, како и потпишување на договор со Еуротрансплант што ќе овозможи размена на органи со блиски земји.
Годинава, покрај трансплантациите од жив донор, направени се и четири кадаверични трансплантации и осум пациенти на дијализа добија шанса за нормален живот со бубрегот од починат донор. Планирано е оваа бројка да биде двојно зголемена во 2020 година, наведуваат од Министерството.
Паралелно со трансплантацијата на бубрег, се прават подготовки и за трансплантација на срце и црн дроб. Тим експерти кардиохирурзи, кардиолози и интернисти се во координација и веќе се работи на изработка и на Национална листа за трансплантација на срце, а паралелно со тоа и на финиширање на подготовките за практична реализација на зафатот. Целта е идната година да се направи и трансплантација на црн дроб во земјава, потенцираат од Министерството.
Од Министерството планираат идната година да ја посветат на кампања за подигнување на свеста за органодонорството. Трансплантацијата ќе биде тема и на стручната дебата на 15 октомври, светскиот ден на органодонорство.