За нов тренер во наредниот период е назначен Алекандар Јончевски. Новонастанатата ситуација доаѓа по четирите порази во АБА лигата. Три беа убедливи со над 20 коша разлика од Ц. Звезда, од Партизан и од Цедевита
„Чест ми е што ќе бидам тренер на МЗТ Скопје и тоа во натпреварувања како АБА лигата и Еврокупот. Преку учество во Еврокупот ќе собирање искуство за што подобар пласман во АБА лигата, по можност во горниот дел на табелата. Целите за домашната сцена се јасно детерминирани. Се однесуваат на освојување на двојната круна“ , рече Емил Рајковиќ на 22 јули ова лето при промоцирата за нов тренер во кошаркарскиот шампион на Македонија.
Два ипол месеци подоцна пресврт. „Емил Рајковиќ повеќе не е тренер на МЗТ Скопје“, осамна наслов на официјалната клупска интернет страница. Прекинот на соработката се случи по поразот (85:89) од Цибона во СЦ „Јане Сандански“. И тоа не е единствен новитет. Клубот се раздели и со Џеремаја Мејси (34), Американец со македонски пасош, и Тори Томас од САД кои се пристигнаа во клубот во летниот преоден рок.
„Човек сум кој негува високи морални вредности, па затоа поднесувам неотповиклива оставка. Се трудев и дадов се од себе, но едноставно не направивме резултат поради што ваквата моја одлука можеби е најдобра и за мене и за клубот. На МЗТ Скопје му посакувам среќа во наредниот период во сите натпреваруања“, порача Рајковиќ по повлекувањето што беше прифатено од управата на аеродромци.
За негов наследник во наредниот период е назначен досегашниот асистент Александар Јончевски. МЗТ Скопје ја почна сезоната со трофеј. „Сино-белите“ од Аеродром триумфираа во Суперкупот на Македонија, но влезот во „јадранската“ конкуренција, сепак, беше фатален за Рајковиќ.
Факт е дека македонскиот првак имаше тежок распоред и мораше да отвори со четирите гиганти од регионот – Црвена звезда, Партизан, Цедевита и Цибона. Забелешките за довчерашнниот тренер, дотолку, не се поразите колку што е убедливата разлика со која беа претрпени со исклучок на последниот од „цибоси“. Белградските „црвено-бели“ славеа со 91:69, „црно-белите“ триумфираа со 93:62, а хрватскиот евролигашки претставник со 82:61.
МЗТ Скопје значително беше активен на кошаркарскиот пазар во летниот период. Клубот ги врати Марко Симоновски и Урош Лучиќ, го продолжи договорот со Ѓорѓе Дреновац, ги ангажира Хрватот Јуре Лалиќ, Холанѓанецот Шарлон Клоф и Американеците Џеремаја Мејси, Тори Томас, Џош Скот и Хавиер Темс. Резултатите, сепак, изостанаа, а кога нив ги нема, вообичаено во спортот, прв на удар е тренерот. Рајковиќ го почувствува моментот дека е дојден за оставка што и го стори. Со него заминуваат и двајца од летните принови на „сино-белиот“ кошаркарски состав од населбата „Јане Сандански“.