Американците Даниел Џенсен и Бред Бејли се нови членови на МЗТ Скопје Аеродром. Нивното приклучување кон „штрковите“ се очекува најдоцна до вторник за кога е најавен и почетокот на подготовките за новата сезона.
Џенсен (23) е висок 203 сантиметри и игра на позиција крилен центар. Минатата сезона ја мина во дресот на белгиски Лимбург и, меѓудругото, важи и за одличен шутер. Статистиката, како што наведуваат од клубот, покажува дека секој трет негов обид за тројка минува низ обрачот и се надеваат дека ќе биде од големо значење на „сино-белите“ од СЦ „Јане Сандански“ во настапите во АБА лигата и во домашното првенство.
За неговиот сонародник со славно дипломатско презиме кај нас, пак, трансферот во МЗТ Скопје ќе биде прво интернационално искуство во кариерата. Бејли има 20 години, висок е 200 сантиметри и игра на позицијата ниско крило. Последните четири години ги одигра за универзитетскиот тим на Сан Диего и во минатата сезона бележел по 15,6 поени и 6,9 скока по натпревар. Тројките, исто така, се сметаат за негов најсилен адут.
Управата на аеродромци претходно обезбеди потпис на уште еден Американец. Ерик Гарсија ја прифати понудата на шесткратниот македонски првак и во Скопје ќе пристигне од екипата на Вофорд во американската НЦАА лига. Во тимот на МЗТ Скопје се враќаат и репрезентативците Дамјан Стојановски и Бобан Стаиќ. Тренерот Александар Тодоров на располагање ќе го има и Бојан Трајковски, дел од првата екипа ќе бидат и перспективните Андреј Маслинко, Михајло Митев и Ранко Мамузиќ.