На 19.декември Основниот суд Скопје 2 ќе донесе одлука дали семејството на убиениот Рами Јусуфов ќе добие милион евра отштета во случајот против МВР и Јохан Тарчуловски.
Јусуфов беше убиен во селото Љуботен во 2001, а доколку судот одреди семејството да биде обесштетено, средствата ќе се исплатат од буџетот на МВР, бидејќи судот веќе донел одлука со која го отфрлил барањето за проширување на тужбата против Јохан Тарчуловски.
Семејството се повикува на пресудата на Меѓународниот кривичен суд во Хаг, каде пишува дека Тарчуловски учествувал како припадник на безбедносните сили токму во тоа село во критичниот ден кога бил убиен Рами Јусуфов.
Тарчуловски во затворот во Шевенинген беше спроведен на 16 март 2005 година по барање на Хашкиот трибунал. Судот во 2008 година го ослободи ексминистерот Љубе Бошкоски од обвиненијата за извршени злосторства во скопското село Љуботен, но затоа, пак, Јохан Тарчуловски беше осуден на казна затвор во траење од 12 години.
Тарчуловски моментално се наоѓа во домашен притвор поради настаните што се случија на 27 април во Собранието.