Соопштение на ЦИВИЛ – Центар за слобода, по повод Меѓународниот ден на мирот
Оваа година се одбележува 25-годишнината од усвојувањето на Декларацијата и Програмата за акција за култура на мирот од страна на Генералното собрание на Обединетите нации.
Во таа декларација, најинклузивното тело на Обединетите нации призна дека мирот „не е само отсуство на конфликт, туку бара и позитивен, динамичен партиципативен процес каде што се охрабрува дијалогот и конфликтите се решаваат во дух на меѓусебно разбирање и соработка“.
Во свет со зголемени геополитички тензии и долготрајни конфликти, никогаш немало подобро време да се потсетиме како Генералното собрание на ОН се собра во 1999 година за да ги изложи вредностите потребни за култура на мир. Тие вклучуваат: почитување на животот, човековите права и основните слободи; промовирање на ненасилство преку образование, дијалог и соработка; посветеност на мирно решавање на конфликтите; и придржување кон слободата, правдата, демократијата, толеранцијата, солидарноста, соработката, плурализмот, културната различност, дијалогот и разбирањето на сите нивоа на општеството и меѓу народите.
ЦИВИЛ, организација за човекови права и слобода е врсник со оваа важна декларација на Обединетите нации. Уште од самото основање на ЦИВИЛ на 25 ноември 1999 година, во својата визија и мисија, организацијата ги промовира човековите права и слободи, мирот и демократијата, и се залага за свет во кој луѓето ќе живеат мирно и достоинствено. Во своите темели, ЦИВИЛ ги вгради бескомпромисните заложби за општество каде што човековите права и слободи ќе се почитуваат во целост, култот кон оружјето и насилството ќе биде надминат, а дискриминацијата, нееднаквоста, омразата, предрасудите, и национализмот ќе бидат само мрачна епизода на минатото.
На Меѓународниот ден на мирот, ЦИВИЛ ги повикува сите граѓанки и граѓани, своите членови, поддржувачи, активисти, волонтери, како и граѓанските здруженија, политичките субјекти, да го изберат мирот наспроти војната, дијалогот наспроти насилството, правдата наспроти кршењето на човековите права и воените злосторства.
Меѓународниот ден на мирот оваа година нè потсетува колку лесно може да се наруши и распадне мирот во светот. Руската агресија врз Украина, веќе трета година, го дестабилизира светскиот мир преку ужасните злосторства против човештвото, негирање на правото на постоење по било која основа и со очигледна намера за истребување на украинската нација.
Во време кога сите земји во светот се меѓусебно поврзани и зависни на најразлични начини, воената агресија против Украина, како и сите воени и други конфликти во светот го загрозуваат сечиј живот на оваа планета. Затоа, ЦИВИЛ повикува и се придружува на иницијативите за обединување и одбрана на правото за мирно и достоинствено живеење во демократски и праведни општества каде што војната и воените злосторства се недвосмислено и решително осудени. Секој поединец во светот има можност да придонесе кон општество ослободено од поделеност, омраза, дискриминација, сегрегација и насилство.
Со силна поддршка за Украина и украинската нација, и на Формулата за мир на украинскиот претседател Зеленски за целосно ослободување на земјата од руската агресија и за постигнување праведен мир, ЦИВИЛ повикува на обединување на светот во заложбите за ставање крај на воената агресија и нелегална окупација на делови од Украина. Многубројните изгубени човечки животи да бидат и последни што ќе сведочат за хоророт и деструкцијата што војната ги носи со себе.
ЦИВИЛ стои на ставот дека мирот, слободата и еднаквоста се вредности кон кои се стремат и граѓанките и граѓаните на Северна Македонија. Тие вредности треба сите заеднички секојдневно да ги почитуваме, споделуваме и промовираме. Негувајќи го мултикултурализмот наспроти меѓуетничките конфликти, промовирајќи ги заложбите за европските и зелените вредности, наспроти националистичките наративи, дезинформациите и пропагандата, заеднички ќе ја извојуваме битката за демократско и праведно општество.
ЦИВИЛ – Центар за слобода