На 5 ноември Јордан Орце Камчев во притворот каде се наоѓа, ќе биде посетен од советникот во Бугарската амбасада во Скопје, Герман Ванчев.
За ова, информира судијата во случајот „Плацеви на Водно“ на денешното рочиште од истоимениот судски процес, Илија Трпков. Трпков истовремено извести дека одобрил да се реализира посетата за која барање стигнало од амбасадата на Бугарија во Република Северна Македонија во форма на вербална нота.
-Има вербална нота доставена од амбасадата на Бугарија со барање до Министерството за правда да дозволи советникот Герман Ванчев да го посети државјанинот на Република Бугарија, Јордан Камчев. Од моја страна е дадена дозвола да се изврши таа посета исто како што беше и за Јан Фигел иако во документите тогаш имаше само фотокопија од негов дипломатски пасош”, информира судијата Трпков.
Инаку на денешното рочиште поврзано со случајот „Плацеви на Водно“ сведочеше Александар Ивановски, познат во бизнис заедницата како Алек Теранова за тоа како била организирана целата шема за купување на плацевите на Водно.