Романската полиција пронашла десетици пакети со кокаин со вкупна тежина од околу 100 килограми кои брановите ги исфрлиле на брегот на Црното Море. Надлежните претпоставуваат дека дрогата е дел од товарот на бродот што пред десетина дена се преврте во делтата на Дунав.
Според полициски извори, пакетите ги пронашле граѓани на плажите на романското приморје и пријавиле во полиција. Полицијата во градот Констанца предупреди да не се отвораат пакетите на плажата затоа што содржат опасни материи.
На брегот на Црното Море во тек е голема операција против шверц на наркотици со која раководат романското обвинителство, полицијата, жандармеријата и граничарите. Властите пред десетина дена запленија повеќе од еден тон кокаин со висок квалитет што бил скриен на брод што се преврте во делтата на Дунав, а тогаш беше соопштено дека полицијата уапсила двајца Срби.
Уличната вредност на запленетата дрога се проценува на околу 300 милиони евра.