На прес-конференција во Салцбург: Марсел Хиршер се одјави од скијањето

Севкупниот победник во Светскиот куп во алпско скијање од последните осум сезони, Марсел Хиршер објави крај на кариерата. Австриецот се повлекува на 30 годишна возраст, а одлуката ја соопшти на прес-конференција во родниот Салцбург.

Хиршер во кариерата оствари 67 победи во Светскиот куп од кои 32 во слалом, 31 во велеслалом, три во паралелен слалом и една во супервелеслалом. Покрај осумте големи Кристални глобус, освои и по шест мали во слалом и во велеслалом.

На зимските Олимписки Игри во Пјонгчанг во 2018 година се закити со злато во велеслалом и во комбинација, а од Игрите во Сочи во 2014 година се врати со сребро во слалом. Во богата колекција има и седум златни медали и четири сребрени од Светските првенства.