Иако според прочистениот текст во 2014 на Изборниот законик, партиите имаат право на увид во Избирачкиот список, на пратеникот Стефан Богоев од СДСМ, денеска не му беше дозволено во името на партијата да го направи тоа.
Богоев со печат од партијата СДСМ во подрачната единица на Државната изборна комисија во Центар побара увид по што му одговорија дека тоа може да го направи само индивидуално за себе, односно со своите лични податоци.
Според Богоев, ова било доказ дека се крие хаосот во Избирачкиот список и бројката на како што вели „фантомските гласачи“.
Тој ги потенцираше предусловите на партијата за фер и демократски избори, а тоа се однесува на комплетно прочистена листа на гласачи, на реформи во медиумите и на одвојување на партијата од државата.
Во Изборниот законик, во членот 49, став 5 се вели:
„Политичките партии во текот на јавниот увид до заклучувањето и потпишувањето на избирачкиот список можат да направат увид на податоците во Избирачкиот список“.
Досега во работата на Државната изборна комисија, од Избирачкиот список се бришат 3.131 лица за кои е утврдено дека се починати и две лица кои имаат два матични броја, останатото останува статус кво како и претходните списоци.
Последната реакција за ова неодамна дојде од ИФЕС. Според набљудувачот Џон Арон, детална проверка на списокот е невозможна до 5.јуни кога се закажани и изборите.
„…Барањата до МВР за проверка на информациите кои веќе ги имаме и кои беа користени при вкрстената проверка, нема да донесат информации и не обезбедија уверување за веродостојноста на податоците кои се проверуваат. Според сознанијата, МВР може детално и конечно да ги провери сите идентификувани проблеми, но на законскиот процес за ова ќе му треба време и тоа не може да се направи до изборите на 5 јуни“, се вели во извештајот на Арон доставен до ДИК.