Министерката за култура, Бисера Костадиновска Стојчевска посочи дека најголем дел од средствата ќе добијат проекти од областа на музичката дејност и издаваштвото.
Над една милијарда денари ќе бидат поделени на проекти за културата, преку „Годишните конкурси за финансирање проекти од национален интерес по одделни области и активности од културата за 2022 година“, објавија од Министерството за култура.
„Дадена и е предност на домашната ’жива култура’. Запазени се и другите приоритети: поддршка на проекти на млади, на проекти наменети за деца или за лица со посебни потреби. Комисиите внимавале да поддржат проекти и од подносители кои досега не користеле средства од буџетот на Министерството за култура. Исто така, при селекцијата на проектите, комисиите воделе сметка и за правичната застапеност по етничка основа. Поддржани се и голем број проекти во кои до израз доаѓа интеркултурноста. Еднакво се водело сметка и за родовата рамноправност“, додаде Костадиновска-Стојчевска.
На конкурсот биле доставени 3.769 пријави, но од Министерството не прецизираа колку од апликантите ги исполниле условите и добиле финансиска поддршка.
Министерката за култура на прес-конференција информираше дека по административната проверка на доставената документација, службите констатирале дека поголем број од пријавите, речиси 2/3, се пополнети со технички пропусти.
„Од тие причини, а во интерес на корисниците, рокот за пријавување беше двапати продолжен. Тоа подразбираше, како што беше и најавено, дека резултатите од Конкурсот ќе бидат објавени, наместо до 20 јануари, најдоцна до средината на февруари“, нагласи Костадиновска-Стојчевска.
24 национални установи ќе добијат средства од буџетот, а над 80 милиони денари биле одвоени за заштита на културното наследство, меѓу кои Скопски аквадукт и Спомен-куќата на Лазар Личеноски, црквата „Св. Ѓорѓи“ во Курбиново и други.