Продолжуваат протестите против војската на Бурма и повторно имаат крвави резултати. Минатиот петок војската на Бурма уби над 80 демонстранти во градот Баго. Иако масакрот се случил во петокот, веста дошла на виделина дури после еден ден бидејќи многу жители биле принудени да бегаат во околните села.
Бурмиската војска изнесувеше непоткрепени тврдења за измама околу резултатите на изборите кои се одржаа во ноември, 2020. Во овие изборите партијата Националната Лига за Демократија предводена од Аунг Сан Су Чи освои преку 80% од местата во парламентот на Бурма.
Аунг Сан Су Чи е долго-годишна активистка која стана де факто лидерот на Бурма кога нејзината партија победи на изборите во 2015та година. Таа не можеше да стане претседател на Бурма бидејќи има деца кои се странски државјани – нешто што се забрането од страна на уставот на Бурма – и затоа пред државниот удар таа ја имаше титулата државен советник, но беше де факто лидер. Су Чи се бореше со години против владеењето на војската во Мјанмар (името на државата Бурма кое го користи војската) кое е присутно речиси од осамостојувањето на Бурма во 1948. Од 1885та до 1948та година Бурма била колонија на Велика Британија. Су Чи беше во домашен притвор скоро 15 години заради нејзиниот активизам и дури доби Нобелова награда за мир во 1991та година додека сѐ уште беше во домашен притвор.
Но овој имиџ како борец за човекови права се промени кога Су Чи не ја спречи бурмиската војска која вршеше геноцид врз малцинството на рохинга муслимани во Бурма. Во 2017тата година се смета дека бурмиската војска убила околу 10 000 рохинга муслимани и дека војската принудила повеќе од 700 000 луѓе да ја напуштат државата како бегалци. Геноцидот против рохинга малцинството во Бурма беше признаен од Меѓународниот суд за правда (тело на Обединетите Нации), но Аунг Сан Су Чи ја одби пресудата, велејќи дека тоа се само „непоткрепени наративи“ од групи за човекови права и истражувачи на ООН.
На 1ви фебруари, 2021 бурмиската војска го започна државенот удар против демократски избранaта влада предводена од Су Чи. Војската ја уапси Аунг Сан Су Чи, претседателот Вин Мјинт и други високо рангирани од Националната Лига за Демократија. По овие апсења, војската декларираше вонредна состојба која сѐ уште трае.
Бурмискиот народ скоро веднаш реагираше: веќе на 2ри фебруари луѓе правеа врева во знак на протест преку удирање на тенџериња и тави од нивните домови. Овој непосреден револт се претвори во цело движење против бурмиската војска кое користеше различни техники на протест како престанување со работа на болниците, граѓанска непослушност и организирани протести. За да ги спречи протестите, бурмиската војска ги блокираше Твитер и Инстаграм на 6ти фебруари (кои подоцна беа одблокирани) и започна со спроведување на полициски час на 8ми фебруари. Но како што растеше движењето против војската и државниот удар така стануваа сѐ побрутални методите на бурмиската војска. Но, про-демократското движење во Бурма продолжи да расте; некои од демонстрациите дури имаа стотици илјади демонстранти. Некои го нарекуваат оваа движење, кое сѐ уште трае, „пролетната револуција“ на Бурма.
Од 1ви фебруари до сега, бурмиската војска има убиено над 600 луѓе. Је Хтут, еден од организаторите на протестите, кажа: „Ова е како геноцид. Тие пукаат во секоја сенка“.
Елена Гаговска