Надзорната расправа ќе покаже, кој политички фактор од актуелната власт затаил, не си ја извршил својата обврска или не покренал соодветна постапка за спречување на трагедијата. Врз основа на аргументите изнесени на надзорната расправа, Собранието ќе утврди политичка одговорност. Политичката одговорност подразбира оставка или разрешување на носители на јавни функции.
Тито Петковски
Дел од јавноста, со право се прашува, зошто владејачкото мнозинство бега од надзорна расправа за најголемата трагедија во поновата македонска историја?
Доколку се согласиме дека македонското Собрание е централна демократска институција на нашиот политички систем, тогаш дилеми не би требало да има. Тоа е вистинското место, каде на отворена сцена се водат политички битки по сите прашања од интерес на граѓаните, државата и општеството.
Како на поранешен пратеник, совршено ми е јасно зошто власта бега од дебата, но не постои релевантен аргумент со кој тој став може да се одбрани. Едноставно, власта е свесна дека е одговорна за трагедијата, но не сака тоа јавно да го признае. Не може да се сокрие дека трагедијата се случи за време на нивно владеење. И ако, за кривична одговорност може да посочи одговорни луѓе од некои претходно власти, моралната и политичка одговорност, не може да ја префрли на претходната власт.
Нашиот Устав јасно ги разграничува надлежностите на законодавната, извршната и судската власт. Судската власт си ја врши својата работа, но законодавната и извршната, со прст не мрднуваат, што би рекол нашиот народ,односно се однесуваат крајно неодговорно.
На власта и е јасно дека Собранието и Владата не се надлежни да ја супституираат судската власт, но се надлежни за утврдување на политичка одговорност на носители на јавни функции. Свесни се дека, за трагедија од вакви размери, политичката одговорност едноставно неможе да се избегне. Тоа е клучната болка на Владата.
Владата е избрана, покрај другото да ја штити и (заштити) безбедноста на граѓаните, нивните животи и материјалните добра. Одговорна влада, мора да оди во пресрет на сите можни закани по безбедноста на граѓаните и државата, да ги превенира и елиминира. Во случајот на Кочани, нашата Влада тоа не го направи и за тоа е одговорна.
Надзорната расправа ќе покаже, кој политички фактор од актуелната власт затаил, не си ја извршил својата обврска или не покренал соодветна постапка за спречување на трагедијата. Врз основа на аргументите изнесени на надзорната расправа, Собранието ќе утврди политичка одговорност. Политичката одговорност подразбира оставка или разрешување на носители на јавни функции.
Мантрата “да ги оставиме институциите да си ја завршат работата”, може да важи само за судската власт, која утврдува кривична одговорност. Не одговорно е, политичка одговорност да се бара по завршување на кривичната постапка. И кога се говори за”институции”, мора да се има во вид дека и Владата и Собранието се институции.
Од Фејсбук ѕидот на авторот