Во рамки на манифестацијата Салон на стрип Белград, на меѓународниоот натпревар кој се одржува овој викенд по 15-ти пат, дел од наградите отидоа за автори од Македонија.
Младата Калина Печевска од Скопје ја освои наградата „Млад лав“ за стрипот „Отфрлената жена“, за најдобар учесник во категоријата до 15-годишна возраст, додека Марија Стојановска, исто така од Скопје, за стрипот „Кафе на ѕидот“ се закити со награда од спонзорот на манифестацијата „Сириус продакшн“.
Стрип центарот на Македонија – Велес, на натпреварот организирано испрати петнаесеттина стрипа на млади македонски таленти, бидејќи претходно максимум 4 до 5 Македонци учествуваа на овој натпревар.
„Стрип центарот на Македонија од порано практикува организиран настап на вакви меѓународни конкурси и фестивали, пракса што започнуваме да ја интензивираме и прошируваме. Конкретно, испраќаме стрип-дела на лица со кои СЦМ соработува, пред сѐ млади стрип-автори. Реалните факти посочуваат дека македонската стрип-сцена недоволно е застапена на вакви настани во странство. Во моментов, освен на фестивалите во Лесковац и Призрен, поискусните стрип-автори не учествуваат на други конкурси“, вели проектниот координатор Томе Трајков.
Покрај двете наградени, во официјалната селекција од сто најдобри стрипа изложени на манифестацијата влегоа и македонските автори Катерина Николовска, Мирко Бојаџијевски, Евгенија Трајковска, Катерина Апостолска, Стефанија Ристовска, како и Александар Стеванов, годинашниот лауреат на Признанието за развој и афирмација на стрипот во Македонија „Љупчо Филипов“, кое кон средина на идниот месец ќе биде доделено на Меѓународниот салон на стрип – Велес 2017.