По информациите дека професорката Мирјана Најчевска и директорката на Хелсиншки комитет Уранија Пировска утре во 9 часот се повикани на информативен разговор, се огласија претставниците од Шарена револуција и Протестирам. Додека Најчевска и Пировска ќе бидат на распит во полициската станица Беко, привразниците на граѓанските движења ќе им дадат поддршка со присуство пред П.С во центарот на Скопје. Ви го пренесуваме целосно соопштението од Шарена револуција и Протестирам.
„Продолжува хајката и репресијата на режимот против борците за човекови права, против нашето право на протест, против секој/a од нас. Нашите соборки Уранија Пировска и Мирјана Најчевска, едни од најактивните заштитнички на човековите права во Македонија, се повикани на информативен разговор во полиција заради нивните протестни дејствија против автократскиот и корумпиран режим.
Продолжуваат мерките на заплашување врз слободната мисла, но тоа нас не јакне. Колку повеќе се обидуваат да не замолчат, толку повеќе не здружуваат и зајакнуваат. Нема да им помине, нашата порака е СТАВ НАМЕСТО СТРАВ – ЛИЦА НАМЕСТО МАСКИ!
Затоа, за да им покажеме дека нема да не запрат, ве повикуваме утре (среда) во 08:45 часот наутро пред полициската станица Беко во Скопје, да ги придружиме и поддржиме Уранија и Најче кои се повикани на “информативен” разговор и да упатиме уште една јасна анти-режимска порака.
Нема правда, нема мир, се гледаме утре во 08:45 часот пред полициска Беко“, повикаа Шарена револуција и „Протестирам“ преку Фејсбук.