Воени тимови од Индија и денеска трагаат по исчезнати лица откако еден век стар висечки мост се урна во река вчера во западната индиска држава Гуџарат, при што загинаа најмалку 133 лица а повеќе стотици паднаа во водата. Ова е една од најтешките несреќи во земјата во последните години.
Додека семејствата ги оплакуваат загинатите, вниманието се сврте кон тоа зошто мостот, изграден од Британците кон крајот на 1800-тите и кој се сметаше за „инженерско чудо“, се урнал и кој би можел да биде одговорен.
Мостот бил под реконструкција и на 26 октомври повторно беше отворен. Весникот Indian Express објави дека компанијата го отворила мостот без претходно да добие „сертификат за безбедност“.
Властите соопштија дека структурата се урнала под тежината на стотици луѓе. Снимките од катастрофата покажаа дека мостот силно се тресе и луѓето се обидуваат да ги држат неговите кабли пред да попушти и да се урне во реката.
Визуелните слики од местото на катастрофата покажаа дека мостот се подели на средина и металната патека виси надолу, а држачите му се скинати на повеќе места. Најмалку 177 преживеани се извлечени од реката.
Извор: Асошиетед Прес