Најмалку 18 лица загинаа, а 59 се ранети во руски ракетен напад врз преполн трговски центар во украинскиот град Кременчук вчера доцна попладнето, соопшти шефот на украинската Државна служба за вонредни состојби, Серхиј Крук.

Службата за итни случаи сè уште трага по жртвите, изјави за „Киев индипендент“ Максим Коваљев, службеник за печат на администрацијата на регионот Полтава.

Се очекува бројот на загинати да се зголеми додека спасувачите продолжуваат со потрагата, рече Ковалев.

Гувернерот на регионот Полтава изјави дека 36 лица се уште се водат како исчезнати по вчерашниот напад на трговскиот центар Кременчук, додека спасувачите продолжуваат да пребаруваат низ урнатините.

Фото: theguardian.com

„Повеќе од илјада луѓе работеа цела ноќ на урнатините – спасувачи, полицајци, медицински лица и волонтери“, рече Дмитро Лунин во објава во раните утрински часови на Телеграм.

Украина побара денеска да се одржи итен состанок на Советот за безбедност на Обединетите нации поради руското гранатирање на цивилни објекти во Киев и Кременчук.

Лидерите од целиот свет побрзаа да го осудат смртоносниот напад врз трговскиот центар во Кременчук, Украина, како невидено воено злосторство, а меѓународниот гнев расте поради нападот, пренесе Гардијан.

Фото: theguardian.com

Во заедничката изјава, лидерите на Г7 го осудија нападот и го оквалификуваа како воено злосторство бидејќи бил насочен кон цивили.

„Ние стоиме обединети со Украина во тагата за невините жртви на овој брутален напад. Неселективните напади врз невини цивили претставуваат воено злосторство. Рускиот претседател Путин и одговорните ќе одговараат. Денеска ја истакнуваме нашата непоколеблива поддршка за Украина пред руската агресија, неоправдана војна по личен избор, која беснее 124 дена“, се вели во реакцијата.

Исто така, францускиот претседател Емануел Макрон го нарече нападот „одвратен“, велејќи: „Ја споделуваме болката на семејствата на жртвите и гневот пред таквото злосторство. Рускиот народ треба да ја види вистината“.