Тинејџери на 17-годишна возраст се досега најмладите во земјата коишто се вакцинирале против ковид-19.

Меѓу најмладите имунизирани кои примиле една доза се 11 лица, а осуммина од нив се заштитиле со две дози против ковид-19.

Според извештајот на Институтот за јавно здравје за периодот од 28.јуни до 4. јули 2021 година, со најмалку една доза вакцина досега се имунизирале 11. 198 лица на возраст од од 17 до 27 години, а втора доза примиле вкупно 5.597 лица.

Како што денеска изјави министерот за здравство, Венко Филипче, ќе се дозволи вакцинирање на деца од 12 до 16 годишна возраст  со вакцината на Фајзер.

И во повеќе европски земји се намалува старосната граница за вакцинација.

Според агенциски вести, белгиските власти одобрија вакцинација на децата помеѓу 12 и 15-годишна возраст, но само со дозвола од родител или старател.

Адолесцентите ќе можат да се вакцинираат само со вакцината на Фајзер и на доброволна основа.

Одлуката младите да се вакцинираат само со Фајзер се заснова на препораката на Европската агенција за лекови, ЕМА.

Министерот за здравство на регионот Брисел, Ален Марон, изјави дека е важно адолесцентите да се вакцинираат што е можно во поголем број за да се забави ширењето на вирусот, кој поради делта сојот предизвикува сериозна загриженост во Белгија.

Земјата во последните недела дена повторно се соочува со експоненцијален раст на новозаразени од Ковид-19. Иако тоа се должи делумно на фактот што граѓаните се тестираат масовно пред заминување на одмор, експертите се одлучни дека делта сојот е исто така дел од причините.

Здравствените власти алармираат дека без масовна вакцинација наесен земјата може да се соочи со четврт бран.