Максимални температури од 39 степени Целзиусови вчера биле измерени во Демир Капија, Гевгелија и Скопје, а највисоките температури досега ова лето се измерени во јуни, 41 и 42 степени во Гевгелија и Демир Капија. А поради транспорт на прашина од Сахара, атмосферата вчера и денеска е заматена, велат синоптичарите од УХМР.
Во врска со забелешките на многумина граѓани на Скопје дека вчера чувствувале како да било најтопло од почеток на летово, од УХМР појаснуваат:
– Влагата во воздухот вчера не беше зголемена, а така е и денеска. Највисоки температури измерени во овој месец се на 1 јули со максимални 40 во Демир Капија, на 8 јули 40 степени во Гевгелија и Демир Капија, како и на 13 јули, исто така во Демир Капија. А најтопло досега беше во јуни кога максималните температури достигнаа 41 и 42 степени и тогаш беше прогласена и портокалова фаза – објаснува Јулијана Фидановска Мишковска, дежурен синоптичар УХМР.
Во Скопје денеска во попладневните часови ќе има зголемување на облачноста и услови за нестабилност проследена со краткотраен пороен дожд, грмежи и засилен ветер, со температура од 39 степени. Влажноста на воздухот изнесува 29 отсто.
До петок ќе преовладува сончево и многу топло време. Утре кон крајот на денот ќе има локална појава на пороен дожд и грмежи, а за време на викендот и во почетокот на идната седмица ќе има почеста појава на нестабилност со пороен дожд, грмежи и засилен ветер, локално процесите ќе бидат поинтензивни во форма на невреме.
(Љ.Б.)