„Во нивните бели дробови се утврдени траги од дим, што значи дека биле живи во моментот на пожарот“, рече Сарафов.

Завршени се обдукциите и сите покажуваат дека загинатите починале како последица на задушување од пожарот, а не од повреди здобиени од ударот, ниту од експлозија, соопшти на денешната прес конференција заменик главниот обвинител на Бугарија, Борислав Сарафов, пренесе Алсат.

„Во нивните бели дробови се утврдени траги од дим, што значи дека биле живи во моментот на пожарот“, рече Сарафов и нагласи дека конечна проценка за причините за несреќата ќе треба да дадат финалните анализи, но водечка верзија, во овој момент, како причина за несреќата е човечка грешка.

Бугарскиот заменик обвинител Сарафов, кој е и директор на Националната истражна служба, изјави дека продолжуваат анализите и испитувањата на автобусот, коишто треба да дадат одговор за причините и начинот на избувнување на пожарот, како и за сообраќајната анализа зошто автобусот ја напуштил патеката на движење.

Како што кажа тој , досега се испитани двајца сведоци, патници во автобусот коишто биле будни во момент на инцидентот.

„И двајцата даваат објективни информации, испрашани независно еден од друг, изјавите им се совпаѓаат и ги земаме за апсолутно веродостојни“, рече Сарафов,  додавајќи дека во моментот трае разговор со уште двајца од хоспитализираните пациенти.

Сарафов посочи дека продолжуваат испитувањата и анализите на автобусот, кои треба да дадат одговор за причините и начинот на избувнување на пожарот, како и за сообраќајната анализа за причините за кои автобусот ја напуштил патеката на движење.

На денешната прес-конференција на бугарското обвинителство беше соопштено дека се извлечени 44 тела, а беше пријавено дека се починати 45 лица во страотната несреќа.
За едно лице не се знае каде е – ниту дали е меѓу преживеаните, ниту дека е меѓу починатите.
Категорично се отфрлени верзиите за терористички акт и туби со нафта
Разгледани се, но категорично се отфрлени, рече Сарафов, и верзиите за терористички акт и туби со нафта, како можни причини за несреќата.

– Пронајдени се три туби. Трите труби не биле полни и не се запалени. Пожарот не избувнал од нив. Верзијата за терористички акт е професионално разгледана и земени се анализи од автобусот за постоење на терористички акт. Категорично ги отфрламе тие верзии. Не станува збор за терористички акт, изјави Сарафов.

Екипа од обвинителството утре заминува за Скопје за подигање на изработените ДНК профили од роднини на настраданите, кои потоа ќе се искористат за идентификување на починатите. Потоа, нагласи Сарафов, телата на жртвите ќе може да им се предадат на нивните семејства.

Несреќата се случи во вторникот на автопатот „Струма“ кога автобус на превозникот „Беса транс“ се запали враќајќи се од туристичка тура од Истанбул. Во тек е истрагата на истражните органи и идентификација на жртвите, која се очекува да заврши за седум дена.Седумте преживеани моментално се хоспитализирани и се надвор од животна опасност.