Директорот на Развојната банка на Северна Македонија, Кире Наумов го објави првиот повик за директна кредитна поддршка на микро, малите и средните претпријатија. Во првата фаза, како што соопшти на прес-конференцијата во Влада, ќе се кредитираат најпогодените сектори: угостителство, туризам и товарниот транспорт, а целта е првично да се надминат проблемите со ликвидноста. Аплицирањето ќе почне од ноќеска на полноќ.
Висината на кредитите ќе зависи од големината на компанијата, односот од бројот на вработени, а минималниот износ е 3.000 евра. Микро компаниите до 10 вработени ќе може да аплицираат за кредит од 3.000 до 5.000 евра, малите компании со 10 до 50 вработени за 10.000 до 15.000 евра, а средните компании со 50 до 250 вработени за кредит од 15.000 до 30.000 евра. Каматата за сите кредити е нула проценти, отплатата е на 24 месеци со грејс периодот од шест месеци.
Според Наумов, поддршката со бескаматните кредити ќе продолжи и ќе се прошири на другите сектори кои дополнително ќе се утврдат.
„Почитувајќи ги препораките за заштита на јавното здравје, аплицирањето за кредитите од јавниот повик ќе биде електронско, а потребната документација ќе се доставува на меил адресата: kreditiranjecovid1@mbdp.cm.mk“, истакна Наумов.
Владата минатата недела на прес-конференција соопшти дека ќе се обезбеди директна финансиска поддршка за задржување на ликвидноста на микро, малите и средните компани и субвенционирање на придонесите за април, мај и јуни, како дел од првиот сет мерки за справување со последиците од коронавирусот. Како што тогаш рече вицепремиерката за економски прашања, Мила Царовска, обезбедени се 5,7 милиони евра од Развојната банка кои ќе се наменат за микро, малите и средни компании чија економска активност е погодена од КОВИД-19. Секоја компанија во зависност од бројот на вработени ќе може да добие од 3.000 до 30.000 евра.