МЗТ Скопје ја испушти првата меч топка да обезбеди опстанок во АБА лигата. „Металците“ загубија од Игокеа на домашен терен со 67:71 (по четвртини: 14:20, 24:20, 13:18, 16:13) во меч во кој победникот беше одлучен во самата завршница. Гостите од Лакташи се далеку од опасната зона и од ситуација да мораа да победат, но останаа „ладни“ во решавачките моменти. Страхиња Миќовиќ со 20 поени беше најефикасен играч на средбата, Дреновац го предводеше македонскиот шампион со 16.
„Игокеа во целост ја заслужи победата. Додека тие се бореа, ние покажавме неодговорност. Недозволиво е вака да се игра. Вината за овој пораз ја преземам јас. Навивачите и управата на клубот не заслужуваат да гледаат издание без борбеност и одговорност. Можам да разберам да има нервоза и да се греши, но не можам да нема борба. Уште два меча се пред нас и верувам дека ќе успееме да обезбедиме опстанок во АБА лигата“, истакна хрватскиот тренер во МЗТ Скопје, Анте Назор.
Тимот од СЦ „Јане Сандански“ и натаму има осум победи, една повеќе од Задар и Крка додека, пак, Игокеа со триумфот во Скопје се искачи на петтото место на табелата.
„Почетокот беше лош, како во одбрана така и во напад. Бевме под притисок дека мора да победиме и тоа се покажа како проблем. Направивме голем број на кардинални грешки. Игокеа одигра добро меѓутоа, може слободно да кажам, дека сами се победивме. Ние, кошаркарите, ја преземаме вината за поразот“, самокритичен беше Марко Симоновски по натпреварот во кој неговата екипа направи 17 грешки.
Пред МЗТ Скопје се два натпревара со црногорски противници до крај на основниот дел на сезоната. Најпрво ќе гостува во Подгорица кај екипата на Будуќност, а во последното коло го дочекува Морнар од Бар.