Нема крај за фантастичните партии на Расел Вестбрук во НБА лигата. Плејмејкерот на Оклахома сити го забележа 35. трипл-дабл учинок во оваа сезона. Во убедливиот триумф над Филаделфија со 122:97, тој учествуваше со 18 поени, 14 додавања и 11 скока. Притоа имаше и две блокади.
И тоа не е се при неговото најново постигнување. Вестрбук стана првиот кошаркар во историјата на американската професионална лига кој успеал до трипл-дабл ефект без промашување. Против „седумдесетишестките“ шутираше 6/6 за два поена и 6/6 од пенал линијата. Стоотсотен ефект од игра во минатото имаа и Дрејмонд Грин и Бо Аутлоу меѓутоа и двајцата промашија по две слободни фрлања.
На 11 натпревари до крајот на основниот дел на сезоната во НБА лигата, Вестбрук се доближи на шест трипл-дабл постигнувања до легендарниот Оскар Робертсон кој засега е рекордер во оваа статистичка категорија со 41.
НБА лига
Резултати
Орландо – Шарлот 102:109
Бостон – Индијана 109:100
Чикаго – Детроит 117:95
Оклахома – Филаделфија 122:97
Вашингтон – Атланта 104:100
Денвер – Кливленд 126:113
Сакраменто – Милвоки 98:116
Јута – Њујорк 108:101