Партијата Народно движење за Македонија (НДМ), денеска во Уставниот суд поднесе Иницијатива за оценување на уставноста на изборот на членовите на ад хок телото за медиуми.
НДМ смета дека одредбата од Изборниот законик за избор на четири члена во ад хок телото за медиуми по партиска линија од ВМРО-ДПМНЕ и СДСМ, не е во согласност со Уставот на државата.
-Во член 8 став 1 алинеа 3 од Уставот е предвидено дека темелна вредност на уставниот поредок е владеење на правото, според член 9 од Уставот забранета е дискримација по било кој основ, граѓаните пред Уставот и законите се еднакви, според член 23 од Уставот секој граѓанин има право да учествува во вршењето на јавните функции, во член 32 став 2 од Уставот е предвидено дека секому, под еднакви услови му е достапно секое работно место, вели Злате Војновски, член на Извршниот комитет на НДМ.
-Според овие уставни смета дека партискиот изборот на членови на ад хок телото за медиуми од ВМРО-ДПМНЕ и СДСМ отстапува од усвоениот уставен концепт и од одделни уставни гаранции за функционирање и кадровско пополнување и потребата од развивање на таква постапка за селекција, која ќе биде транспарентна, отворена и со јасни правила, при што преку јавен оглас од надлежен државен орган како отворен натпревар да се верификуваат способностите и професионалните капацитети на секој кој се пријавил на оглас, а врз основа на способност, знаење и достигнување.Оттука, партискиот избор на ВМРО-ДПМНЕ и СДСМ на членови во ад хок телото за медиуми е повреда на уставната гаранција за еднаквост и рамноправност на граѓаните, додаде Војновски.
Од НДМ велат дека со месечните хонорари од 80 000 долари за членовите на ад-хок телото, поизлегуваат од буџетот за граѓаните, а се за луѓе поставени од ВМРО-ДПМНЕ и СДСМ.
Ад-хок телото за мониторинг на медиумското известување се формираше месецов, како резултат на преговорите на четирите политички партии – потписнички на Пржино.
Во негов состав се Слаѓана Димишкова и Цветин Чилиманов, предложени од ВМРО-ДПМНЕ, и Горан Трпеновски и Љубомир Костовски, предложени од СДСМ,а еттиот член, кој според партискиот договор треба да е Албанец, ќе се избира утре.
Ова тело предвидено е да функционира до завршување на изборниот процес. Телото ќе врши проценка на балансираното известување.
Првиот прекршок, ќе биде санкциониран со предупредување, а евентуалниот втор сноси парични казни. Ниту еден новинар или медиум нема да биде казнуван за искажување на свое мислење, кое пак, според договореното, треба да се разликува од пласирање на информација.