Без акредитација не може да се влезе секаде во Мелбурн парк, правило што важи за сите без исклучок. Го почувствува тоа на своја кожа и Роџер Федерер кој беше запрен од обезбедувањето во намерата да стигне до совлекувалната.
На снимка на ТВ „Евроспорт“ се гледа како вработен во обезбедувањето го задржува Швајцарецот и покажува дека му недостасува пропусница.
Познато е дека сите учесници на Австралија опен (играчи, тренери, официјални лица на турнирот и претставници на медиумите) мора да носат акредитација со фотографија, со име и презиме, функција што ја извршуваат и бар код што уредно се скенира при влегувањето во комплексот и насекаде низ него.
Федерер не се противеше и ги сочека членовите на неговиот стручен тим на кои им беше дозволено да се упатат кон совлекувалните, откако ги покажаа акредитациите, а Швајцарецот со одност демонстрира професионалност и класа без разлика кој е, што е, колку титули има и колку недели во кариерата мина како лидер на АТП ранг листата.