„Одржавме заеднички состанок на раководството и пратеничката група на Бугарската Социјалистичка партија. Го добивме третиот мандат и кон оваа задача се однесуваме крајно одговорно. Во четири точки ги идентификувавме најважните приоритети за Бугарија и бугарскиот народ во овие кризи. Тоа се приоритети кои постојат во програмите и во намерите на сите партии, односно баравме она што ќе не обедини, а не она што ќе не раздели“.
Ова го изјави лидерката на БСП Корнелија Нинова на вонреден брифинг во парламентот, јави БГНЕС.
„Баравме решенија за излез од кризите во кои се наоѓаме, а особено од политичката криза. Ние зазедовме поинаков пристап, ги поканивме на разговор сите лидери на парламентарни партии. Некои од нив одговорија, некои не – тоа е нивен избор, иако покренува многу прашања“, рече таа.
„Разговаравме за нашите чекори од сега па натаму и решивме: третиот мандат во понеделник ќе му го вратиме на претседателот. Остануваме отворени за разговори со сите кои се важни за Бугарија и бугарскиот народ“, рече партиската лидерка.
На прашањето кој ќе одговара за немањето влада, Нинова коментира дека тоа ќе се види од гласот на бугарскиот народ на претстојните избори.
„Манипулација е сугестијата дека за ова е виновен третиот мандатар, кој и да е тој. Одговорноста е првенствено на првиот, вториот, и на третиот се разбира, но бидејќи првиот не успеа, вториот не успеа, третиот ли треба да понесе одговорност“, рече таа.