Историјата на новогодишната турнеја во скијачки скокови е надградена со трет лик. Рјоји Кобајаши се впиша со златни букви на традиционалните „Четири скокалници“, откако победи и на четвртата и последна станица од годинашното издание.
Јапонецот беше доминантен во Оберсдорф, во Гармиш Партенкирхен, во Инсбрук, а остана недопирлив и во Бишофсхофен каде суверено ја порази конкуренција и се придружи на Свен Ханавалд и на Камил Штох како единствени досега со победи на сите натпревари.
Во Бишофсхофен забележа скокови од 135 метри во првата серија и 137,5 метри во втората и со 282 поена доминира над ривалите. Второто место го освои Полјакот Давид Кубацки, третото му припадна на Штефан Крафт од Австрија.
Со освојувањето на престижните „Четири скокалници“, Кобајаши се зацврсти и на лидерската позиција во генералниот пласман во Светкиот куп во ски-скокови.